Sendeiros de Galicia para o Turismo Rural
Atopámonos no territorio da D.O. Ribeira Sacra, na bisbarra de Terra de Lemos, nun dos sendeiros máis espectaculares pero tamén máis longos e esixentes de Galicia.
Unha senda marcada en 2011 moi dura e de fermosas paisaxes.
Os seus 27 km, os desniveis e as gradas requiren unha boa condición física, sen esquecer a planificación do percorrido, do avituallamento, dos horarios e do transporte de regreso.
PR-G 157 Roteiro Augas Mestas – Doade
Hoxe presentamos unha senda marcada en 2013, moi dura, pero indubidablemente fermosa.
O percorrido permítenos coñecer a Ribeira Sacra seguindo a conca do río Miño dende San Estevo de Ribas de Minho (O Saviñao) ata o lugar de Cima de Atán (Pantón).
Apreciaremos paisaxes que nos deixarán sen palabras, aldeas solitarias como Bexán, A Pena, Millarada ou Marce rodeados de viñedos da D.O. Ribeira Sacra e soutos de castiñeiros centenarios. Os templos románicos de San Estevo de Ribas de Minho, San Paio de Diomondi e San Martiño da Cova, así como as ermidas e castelos encherán este espazo de contido histórico e artístico.
Hoxe presentamos unha senda marcada en 2014, con fermosas vistas sobre o Miño.
Este carreiro mostra a exuberante natureza que rodea o río Deva e permite fermosas vistas sobre o río Miño. Ao ser un roteiro circular pódese iniciar en varios puntos, como a área de autocaravanas de O Valiño ou A Ponte Ballote, sendo aconsellable este último emprazamento xa que conecta tamén co roteiro PR-G 176. Visita a impresionante e medieval (ou romana ? ) Ponte Trado.
Recomendamos contactar co Concello de Pontedeva antes de visitala para garantir que a ruta está transitable, xa que trascorre por algunhas zonas de repoboacións e poden existir traballos silvícolas.
Comparto con vós unha páxina que pode remover conciencias e memorias… fuxidos.es
Foi un proxecto de SEGATUR e co patrocinio público/privado da Administración local e autonómica e dunha asociación hosteleira, baseado nas terribles experiencias dun fuxido nas montañas de Trevinca.
Don Alfonso Ortega Prada, secretario da Sociedade Agraria de Xares (A Veiga, Ourense), deixou manuscrito entre 1936 e 1937 as súas desgarradoras memorias mentres fuxía e se agachaba nas montañas de Trevinca.
Animámosvos a visitar https://fuxidos.es
Traemos aquí unha fermosa senda marcada en 2014, por camiños e sendas de pescadores.
O trazado, de suave pendente, discorre tranquilamente por sendas de pescadores, permitindo gozar da visión de antigas obras hidráulicas tradicionais, outrora moi importantes, como son os muros de contención, canles e muíños.
O frescor da contorna do bosque de ribeira, sempre en sombra e con árbores predominantemente caducifolios como pradairos, carballos, castiñeiros, salgueiros e bidueiros, así como unha frondosa vexetación arbustiva e herbácea, fan que este carreiro sexa un verdadeiro pracer para os sentidos.
Hoxe lembramos unha senda marcada en 2015, por camiños abandonados durante moitos anos…
SEGATUR fixo un traballo importante nesta ruta, buscando camiños esquecidos, recuperando pontellas, investigando en sendas esquecidas e abrindo bosques impenetrables. A despoboación destas aldeas significou a perda do patrimonio ancestral dos seus camiños e das peregrinacións entre capelas, e o transito dos produtos agrícolas.
A senda pasa por un castro sen escavar no Coto do Castro pero con boas vistas, e por levadas e muíños antigos. É de destacar a Igrexa de Santa Mariña da Cidá. Probablemente o seu nome veña dunha citania ós seus pés.
A senda por montaña PR-G 200 Ruta das Lagoas Glaciares da Serpe e de Ocelo, foi revisada no mes de xullo de 2022 polos técnicos de SEGATUR e atopábase en boa situación, pese ós anos dende a súa homologación.
Obviamente precisa un traballo lixeiro de mantemento, pero o seu estado non impide gozar do camiño e das súas impresionantes vistas.
De todas formas, recoméndase facelo con boa climatoloxía e roupa de montaña.
Concello de Rubiá (Ourense).
Percorrido case circular cunha profunda paisaxe natural na montaña dos vales de Valdeorras.
Transcorre polo val do río Cigüeño no Concello de Rubiá.
Visita os cavorcos deste val e os miradoiros sobre Rubiá e o Barco de Valdeorras. Sendeiro homologado pola Federación Galega de Montañismo en 2010.
Tendes máis datos neste enlace:
PR-G 144 – Ruta natural dos Castros e Nivieira
Concello de Santiso.
Actualizamos os datos da nosa web e incorporamos novamente o sendeiro PR-G 125, en Visantoña.
Paisaxes amplas e fermosas con extensións grandes de zonas de pasto para o gando, así como o encoro de Portodemouros.
Tendes máis datos neste enlace:
PR-G 125 – Sendeiro de Visantoña
Concello da Lama.
Actualizamos os datos da nosa web e incorporamos novamente o sendeiro PR-G 135.
Paisaxes con bidueiros e piñeirais, así como extensións grandes de zonas de pasto para o gando, son as vistas desta senda.
Dende o Miradoiro das Tres Rías, nos días de bo tempo, contémplase unha espectacular panorámica coas tres rías da provincia de Pontevedra.
Tendes máis datos neste enlace:
PR-G 135 – Roteiro da Escuadra