Sendeiros de Galicia para o Turismo Rural
SEGATUR realizou traballos de mantemento da Ruta do Canón do Sil – Santa Cristina no Concello de Parada de Sil.
Colocáronse novos sinais e substituíronse aqueles que estaban en peores condicións. No ano 2016 fixemos un mantemento integral e en 2022 foi unha actuación parcial en certos elementos que precisaban unha reparación urxente.
Na imaxe, un novo poste e frecha de madeira gravada e pintada.
Comparto con vós unha páxina que pode remover conciencias e memorias… fuxidos.es
Foi un proxecto de SEGATUR e co patrocinio público/privado da Administración local e autonómica e dunha asociación hosteleira, baseado nas terribles experiencias dun fuxido nas montañas de Trevinca.
Don Alfonso Ortega Prada, secretario da Sociedade Agraria de Xares (A Veiga, Ourense), deixou manuscrito entre 1936 e 1937 as súas desgarradoras memorias mentres fuxía e se agachaba nas montañas de Trevinca.
Animámosvos a visitar https://fuxidos.es
Traemos aquí unha fermosa senda marcada en 2014, por camiños e sendas de pescadores.
O trazado, de suave pendente, discorre tranquilamente por sendas de pescadores, permitindo gozar da visión de antigas obras hidráulicas tradicionais, outrora moi importantes, como son os muros de contención, canles e muíños.
O frescor da contorna do bosque de ribeira, sempre en sombra e con árbores predominantemente caducifolios como pradairos, carballos, castiñeiros, salgueiros e bidueiros, así como unha frondosa vexetación arbustiva e herbácea, fan que este carreiro sexa un verdadeiro pracer para os sentidos.
Hoxe lembramos unha senda marcada en 2015, por camiños abandonados durante moitos anos…
SEGATUR fixo un traballo importante nesta ruta, buscando camiños esquecidos, recuperando pontellas, investigando en sendas esquecidas e abrindo bosques impenetrables. A despoboación destas aldeas significou a perda do patrimonio ancestral dos seus camiños e das peregrinacións entre capelas, e o transito dos produtos agrícolas.
A senda pasa por un castro sen escavar no Coto do Castro pero con boas vistas, e por levadas e muíños antigos. É de destacar a Igrexa de Santa Mariña da Cidá. Probablemente o seu nome veña dunha citania ós seus pés.
A senda por montaña PR-G 200 Ruta das Lagoas Glaciares da Serpe e de Ocelo, foi revisada no mes de xullo de 2022 polos técnicos de SEGATUR e atopábase en boa situación, pese ós anos dende a súa homologación.
Obviamente precisa un traballo lixeiro de mantemento, pero o seu estado non impide gozar do camiño e das súas impresionantes vistas.
De todas formas, recoméndase facelo con boa climatoloxía e roupa de montaña.
Concello de Rubiá (Ourense).
Percorrido case circular cunha profunda paisaxe natural na montaña dos vales de Valdeorras.
Transcorre polo val do río Cigüeño no Concello de Rubiá.
Visita os cavorcos deste val e os miradoiros sobre Rubiá e o Barco de Valdeorras. Sendeiro homologado pola Federación Galega de Montañismo en 2010.
Tendes máis datos neste enlace:
PR-G 144 – Ruta natural dos Castros e Nivieira
Concello de Santiso.
Actualizamos os datos da nosa web e incorporamos novamente o sendeiro PR-G 125, en Visantoña.
Paisaxes amplas e fermosas con extensións grandes de zonas de pasto para o gando, así como o encoro de Portodemouros.
Tendes máis datos neste enlace:
PR-G 125 – Sendeiro de Visantoña
Concello da Lama.
Actualizamos os datos da nosa web e incorporamos novamente o sendeiro PR-G 135.
Paisaxes con bidueiros e piñeirais, así como extensións grandes de zonas de pasto para o gando, son as vistas desta senda.
Dende o Miradoiro das Tres Rías, nos días de bo tempo, contémplase unha espectacular panorámica coas tres rías da provincia de Pontevedra.
Tendes máis datos neste enlace:
PR-G 135 – Roteiro da Escuadra
Nas Pontes de García Rodríguez temos esta impresionante ruta sinalizada en 2011.
Xunto ó río Eume, e alimentadas por numerosos regos, as Fragas da Ribeira e Lostegal mostran a exuberancia dos bosques galegos virxes, envolvidos nun clima húmido e fresco, con moita influencia atlántica.
A característica de estar a cabalo entre os Lugares de Interese Comunitaria (LIC) da Serra do Xistral e o Parque Natural das Fragas do Eume marcan a vitalidade, a cantidade, a variedade e a densidade da flora e fauna.
Ademais da beira do encoro e dos camiños entre os bosques, o visitante pode gozar dende o cumio da Carballeira dunha interesante paisaxe sobre a vila e o lago das Pontes.
Os Camiños do Trega son unha rede de pequenas sendas que permiten achegarnos a este impresionante cumio sobre o río Miño e o océano Atlántico.
Seguindo os seus itinerarios pódese ascender polas súas abas dende a Guarda, dende o barrio da Cruzada ou tamén dende Camposancos, ata visitar o seu afamado castro, a Ermida de Santa Trega, ou as belezas naturais da Pedra Furada e as inigualables panorámicas das que goza en calquera dirección.
A riqueza histórica e paisaxística do lugar ben merece que se coñezan lentamente, facendo sendeirismo tranquilamente e co máximo respecto para este gran legado.